تتصرف كيف يا عبد الرحيم

وجدتها


وجدتها


عرفت النور بيقطع ليه علينا كل شوية مش ترشيد استهلاك ولا حاجة الحكومة عايزة ترجع لنا الزمن الجميل ايام وحوي يا وحوي والفانوس ينور فى الضلمة وطبعا دلوقتي الضلمة بقت عملة نادرة لان الشوارع منوووووووووووورة كلها يبقى الحكومة تعمل ايه علشان نستخدم الفوانيس؟


تتصرف كيف يا عبد الرحيم ؟
تتصرف كيف يا عبد الرحيم ؟


خلاص يا بوي نقطع النور عن الناس واهم يستخدموا فوانسهم والعيال تفرح
" ذكي عبد الرحيم دا . يا فرحة امه به "
دا بالنسبة لقطع النور


تعالو بقي للصواريخ اللى بتفرق فى رمضان ومنتشرة جدااااااااااااااااااااااااااااااااااااا
كل شوية نتفزع من الصوت ونقول هي الحكومة بتدخل الصواريخ دي البلد ليه ؟
ولاني فقيقة شوية توصلت للحل عرفت ليه الصواريخ بتدخل البلد والحكومة ساكته
مش علشان تفرح الاطفال .. ولا علشان تقوي قلوبنا وتجعلنا اشاوس مغاوير لا نهاب اللاصوات المفزعه


اقولكم انا هي عايزة تقلل نسبة المواليد فى البلد واكيد اكيد يعني بعد كل خضة من دول
الناس هتقطع الخلف طبيعي " ياما هيجي لهم صرع " هما وحظهم بقي  شوفتوا بقي حكومتنا بتفكر حلو ازاي همها مصلحتنا يا جماعة.


حسبي الله ونعم الوكيل
اصلي لسه مفزوعه من صاروخ دلوقتي

فطار فى كنتاكي

فطار فى كنتاكي

كنا عقبال عندكوا فى وسط البلد بنشتريي شوية لوازم " ومحدش يقولى اشتريتوا ايه "
وطبعا احنا فى رمضان والمحلات تقريبا على الساعه خمسة بتبدا تغلق للاستعداد للافطار واحنا كمان قلنا نروح اقرب مكان نفطر فيه وكان الافطار فى كنتاكي .

طبعا زحمة بس الحمد لله وجدنا ترابيزة فاضية وجلسنا عليها كنا خمس افراد
والمكان بعد شويتين ازدحم جدا مافيش ولا ترابيزة فاضية كله مشغول
وكان فى شاب وخطبته بيدوروا على مكان ومش لقيين وعلى ترابيزة اخري كان يجلس رجل وخطيبته منذ حوالى ثلاث ساعات يعني من قبل الافطار وطلبوا اللى عايزينه واكلوا وخلصنا لكنهم مستمرين فى الجلوس 

نقول لهم الناس عايزة تفطر طيب خدوا حد جنبكم خاصة ان ترابيزتهم تكفي اربع افراد لكنهم رافضين طيب انتم اكلتم وخلاص وقعدتم كتير والمفروض فى معاد افطار لناس اخريين ليه مش عايزين تقوموا توسعوا مكان ؟

طيب على الاقل خدوا ناس جنبكم لكن ازاي بقي ؟
المهم  وبما ان رمضان كريم وبيحب اللمة " واحنا واخدين على اللمة كأسرة "
خلينا الشاب وخطيبتة اللى كانوا بيدورو على مكان يجلسوا معانا طبعا احنا مش نعرف  قبل كدا لكن يا جماعه احنا فى رمضااااااااان وحتى لو مش كنا فى رمضان لزم نساع بعض وفعلا جلسنا سبع افراد على ترابيزة مخصصه لاربعه او خمسة بكتير وبدأنا بوضع الطلبات وبسم الله والكل اكل وتجاذبنا الحديث والتعارف .

لكن بقي يا معلم الرجل والمراة اللى مش عايزين يوسعوا لحد دول فضلوا طول الوقت يبصوا لنا " لما كنا هنتخرم من كتر البص " لكن على مين ولا همنا طبعا طبعا كل من فى المحل كان مضايق من اسلوبهم لانهم تعمدوا انهم يطلبوا اكل فى وقت الافطار علشان مش يقوموا رغم انهم جالسين من بدري " شاطرة يعني " .

المهم فطرنا وقمنا وودعنا بعض احنا والشاب والفتاة المخطوبين وكانوا اتنين زي العسل وولاد بلد وعماااااااااااااااار يا مصر  وكريم يا رمضان .


فوتكم فى الكلام " مين هيعزمنا فى رمضان بس مش فى كنتاكي  شوفوا مكان اكبر شوية "

ماذا اقول له ؟

قصيدة جميلة للشاعر نزار قباني





ماذا أقول له لو جاء يسألني.. إن كنت أكرهه أو كنت أهواه؟


ماذا أقول ، إذا راحت أصابعه تلملم الليل عن شعري وترعاه؟


وكيف أسمح أن يدنو بمقعده؟


وأن تنام على خصري ذراعاه؟


غدا إذا جاء .. أعطيه رسائله

 ونطعم النار أحلى ما كتبناه

 حبيبتي!


هل أنا حقا حبيبته؟

 وهل أصدق بعد الهجر دعواه؟


أما انتهت من سنين قصتي معه؟


ألم تمت كخيوط الشمس ذكراه؟


أما كسرنا كؤوس الحب من زمن



فكيف نبكي على كأس كسرناه؟


رباه.. أشياؤه الصغرى تعذبني


فكيف أنجو من الأشياء رباه؟


هنا جريدته في الركن مهملة


هنا كتاب معا .. كنا قرأناه

 على المقاعد بعض من سجائره

 وفي الزوايا .. بقايا من بقاياه..


ما لي أحدق في المرآة ..


أسألها بأي ثوب من الأثواب ألقاه


أأدعي أنني أصبحت أكرهه؟


وكيف أكره من في الجفن سكناه؟


وكيف أهرب منه؟ إنه قدري


هل يملك النهر تغييرا لمجراه؟




أحبه .. لست أدري ما أحب به


حتى خطاياه ما عادت خطاياه


الحب في الأرض . بعض من تخيلنا


لو لم نجده عليها .. لاخترعناه


ماذا أقول له لو جاء يسألني إن كنت أهواه.


إني ألف أهواه


- نزار قبانى -

كفوا ايديكم عن المرأة

قالوا حرية المرأة
لقد ظلمت المراة ويجب ان نأتى لها بحقها.. وتبرعت بعض النساء وبعض الرجال ممن يملكون سلاح القلم .. والاعلام .. والاخراج .. و التمثيل لرفع راية حقوق المراة اين هي ؟

وليتهم ما رفعوها .. وليتهم ما تكلموا عن المراة بهذا الشكل فقد ظلموا لامرأة عندما عرضوها بشكل سلعه للمتعه فقط .
وكأنى حرية المراة فيما تعرضه من جسدها وفي مقدار ما تملكه من جمال ملامح وجسد .

لا نراهم يعرضون امرأة ليست جميلة ويقولن انها عالمة فذة او انها مهضوم حقها ويجب ان نأتى لها به بل بالعكس نراهم يسخرون من تلك المرأة التى لا تملك من الجمال شئ .. وكأنها درجة ثالثة من بنات حواء .

المرأة ليست جسد جميل  يجب تحريره للاخرين حتى تحصل المرأة على حريتها وقيمتها لان هذا يهدر قيمة المراة
المرأة قيمة اخلاق . وعقل .. وقدرة على تحمل المسؤلية واثبات مكانتها فى المجتمع باحترام لائق بها وبمن ستربيهم ليكونوا رجال الغد او نساء الغد .

ايها الافاضل كفوا ايديكم عن المرأة فما تفعلونه بها ليس وضعها فى طريق التقدم بل هو وضعها فى بئر الانحطاط الاخلاقي

ـــــــــــــــــــــــ

على الهامش :

الحجاب ليس مانع لحرية الفكر لاننا بكل بساطة لا نفكر بشعورنا
والا لاصبح الرجل الاصلع اكثر الرجال عبقرية .

* الحرية الا تفرض رأيك على الاخرين فهم ايضا لديهم حرية
فى طرح اراءهم الخاصة .

* الحب مشاعر اعمق بكثير من ان نحصرها فى علاقة بين رجل وامرأة فقط .

* الدين ليس افيون الشعوب وانما هو عماد الحياة .

* الانتقام مرض يصيب صاحبه قبل ان يصيب من ننتقم منهم .

حسدوك يا طير

حسدوك يا طير
على فرشتك
والاكل والماية فى عيشتك

ونسيو انك حبيس القفص
لا جناح يطير ويرفرف
ولا صوت حلو يغني ويفضفض

حسدوك يا طير
ونسيوا انهم فى الحبس اسروك
ومين يطلق حريتك للسما والفضا مين ؟

الام البديلة

الام البديلة
ـــــــــــــــــ

الام البديلة هى تلك الام التي تربي اطفال ليسو اطفالها , تعطي لهم حنانها وصحتها ومجهودها من اجل تربيتهم تربيه سليمة .

فهل تأخذ تلك الام حقها من التقدير مثل الام العادية التى تحمل وتلد وتربي ؟ وايهم تستحق التقدير اكثر تلك الام الحقيقة التى تربي اطفالها لانهم ينتمون لها؟ ام لتلك الام التى تعطي الحنان والحب لاطفال ليسو لها ؟

اكيد هتختلف الاراء فهناك من سيعتبر الاحق هى الام الحقيقية الاساسية واخرون سيكونون مع تلك الام البديلة , ورأي الشخصي ان كل ام تربي اطفالها بطريقة سليمةوبحب وحنان وتنجح فى تلك التربية فهى تستحق التقدير ولا يجب ان نفرق بين الاثنتين فكلاهما اعطت وتعبت وربت اطفال ورجال ونساء .

لكن هناك جزئية اريد الوقوف لديها وهي الانتماء الام الاساسية تربي اطفالها لانهم ينتمون لها والام البديلة تربي اطفالا لا ينتمون اليها فهى تعطي بدون وجود ذلك الحافز التملكي لهؤلاء الاطفال وهذا ما اريد قوله انه شعور الامومة يجب ان يكون شعور اوقى واعمق من ان يرتبط فقط بالاطفال الذين ينتمون الينا فقط بل يجب ان يشمل كل طفل يحتاج لرعاية وحنان , والام البديلة قد تكون زوجة اب لديها رحمة وامومة طبيعية او عمة او خالة او جارة اقولهم هي انسانه لديها قدرة كبيرة على الحب والعطاء وهي من يجب ان يطلق عليها ام .

الخوف من المدرس

السلام عليكم ورحمة الله وبركاته

مرحلة التعليم الابتدائية :

مرحلة يتم تشكيل ذهن الطفل وشخصيته من خلالها , وقد نجعله طفل ذو مكانه

وشخصية عظيمة وقد يحدث العكس , اللى عايزة احكي فيه بقي عن تلك المرحلة

ذلك الخوف الذي كان يزرعه فينا اسساتذتنا الافاضل لدرجة ان عقولنا كانت تتوقف

عن التفكير من الرعب لان الاستاذ فلان يمشي فى طرقة المدرسة يعني هل هلاله الباشا المدرس المرعب

فى الطرقة واحنا بداخل الفصول مرعوبين " طيب حد يقولى ليه , ليه المفروض نترعب "

يمكن علشان ينشط  افراز الادرينالين عندنا , ممكن برضوا اهو تحفيز لغدد الجسم على العمل

طبعا مع الخوف يتوقف العقل ولا ادرك ماهو الدرس الذي يتم شرحه خاصة من مدرس الحساب

وعلى فكرة كان بيدرس دين كمان ما احنا عيال بقي وكله بيمشي .

كرهت الحساب بسبب هذا المدرس وكانت حصه مثل العذاب على نفوسنا

وتعرفوا لما خرجت من تلك المرحلة للمرحلة الاعدادية وجدت ان الرياشيات سهلة جدا

والمدرس اللى بيدرسها بيشرحها بطريقة سهلة وممتعه يجعلنا ننتظر حصته .

يبقى المدرس عليه عامل كبييييييير فى حبنا لمادة تعليميه او كرهنا لها

طبعا الامر اختلف الان فزمان كنا بنترعب من الاساتذة اما الان فالطلبه هم من يرعبون الاساتذة

وكلا الامرين غلط , يعني لازم يبقى فى امور وسط لا خوف لدرجة التعقيد من المدرس للطالب

ولا تسيب لدرجة ان الطالب لا يحترم مدرسه واحيانا يتكاتلون عليه ويضربونه .

اقولكم انا شايفه ان المنظومة التعليمية كلها من مناهج ومدرسين وطلاب عايزة يتعمل لها

نيو لوك علشان بجد بجد يعني اللى بيحصل ده حاجة تفرس

استعنا على الشقا بالله

السلام عليكم ورحمة الله وبركاته


رسالة افتتاحية للمدونه

يلا الكل يستعد ويربط الحزام للانطلاق

مش عايزة كسل ولا حد ينام مننا

أنا شايفة كده فى المووضع الفلاني

واكيد كل واحد له رأي خاص به

ممكن يشوف نفس الى انا شايفاه

او يكون شايف له شوفه تانية

المهم اننا نفتح عيوننا وعقلنا ونحاول نشوف

ونعبر عن اللى شفناه